زيادة براغي

جهاد علاونه

الحوار المتمدن-العدد: 3136 - 2010 / 9 / 26 - 11:39
المحور: كتابات ساخرة
    

أكيد إنه كل المواطنين العرب بروحوا على محلات التصليح زي ما بروح أنا وأقصد محلات التصليح الالكترونية والميكانيكية وأكيد كلهم زي بعضهم البعض بس يفكوا أي قطعه من أي جهاز كهربائي وما بعرفوش كيف يركبوها ويعيدوها لمحلها الأصلي بصيروا يقولوا : هذي القطعه زياده ما فيش ليها أي داعي .

ومره من ذات المرات سكن في حارتنا مكنيكي الكترونيات لمدة عشرين سنة وكان كراجه أو محله ملاصق لبيتنا ولا يبعد عنه سوى عدة أمتار ,وبس طلع من المحل اشتراه منه ميكانيكي سيارات كان هذا الميكانيكي إذا فك (كربوريتر) سياره فورا يطلع منه ما يقرب من 100برغي و100زمبرك و100سمونه وكل هذول قطع زائده .

وأول مره تعرفت عليه –على الفني الإلكتروني- لمّا كان عندي كمره نوع (كونان) أهداني إياها عمي من السعودية...والكمرة تعطلت وحكيتله عنها فطلب مني إحضارها , وأحضرتها له وفكفكها قطعة قطعى وبرغي برغي وسمونه سمونه وسلك سلك ولم يدع فيها شيء إلا وقام بعزله عن الكمره , فقلت له:

-شو هذا؟اللي قاعد بتساوي فيه!.

-شو ..شو هذا! أنا قاعد بصلحلك فيها .

-طيب بس أنت أخرجت كل مصارينها للخارج..القلب والأحشاء والأمعاء الدقيقة .

-شو يعني عادي.

-كيف عادي؟ أي كيف بدك إترجع كل شيء محله؟!.

-لالا هذي بسيطه ولا تشغل فكرك .

-كيف يا زلمه ولا أشغل فكري.

-اسمع يا ولد: هذه البراغي كلها أصلاً زياده, ولا إلها أصلا الداعي أو إللزوم, انت بتفكر اليابانيين حاطينها على شان الكمره تشتغل؟إذا هيك اسمحلي أنت غلطان جدا.

-كيف البراغي زياده؟

-آه زياده .

-طيب وليش اليابانيين بحطوا البراغي زياده؟ يعني اليابانيين ما عندهمش شغل على شان يشتغلوا بالبراغي الزائده.

-عشان إذا ضاع برغي اتلاقي واحد بديل عنه.

-طيب والأسلاك والشرائح الإلكترونية؟

-برضه هذول زياده .

-كيف يا زلمه زياده. أي هذول وزنهن بيجي 200غرام , والكمره كل وزنها 500غرام يعني أكثر من نص القطع اللي فيها زياده .

-آه صح زياده.

-طيب فرجيني كيف بدها تشتغل .


-بسيطه:هذا البرغي مش زياده هذا البرغي محله هون...وهذول العشر براغي كلهن زياده ولا ليهن أي لزوم هذول أخذهن أنت وخليهن معك.

-طيب هاتهن جاي.

وأخذتهن وتناولت كيس من المحل ووضعت البراغي بداخله , ثم أكمل جمع ما قام هو بفكفكته:

-وهذول الأسلاك أصلا مش ضروريات , هذول على شان الخليج العربي حار جدا بحطوهن للتبريد والكمره الآن في الأردن , وهذول السمونات (الرنديلات) مضبوط محلهن كلهن موجود هذي الصغيره هون وهذيك بجانبها ..آه..أمممممم بس هذي من وين أنا فكيتها ؟

-أي مش قلتلك هسع ما بتعرفش تجمعها .

-شو يا ولد ما بعرفش أجمعها أي أنا جامع اللي أتخن وأعقد منها , بس يمكن تكون هذه القطعه فعلا زياده على شان ما فيش ليها أي مكان نهائي.

-كيف ما فيش ليها أي مكان , لعاد احكيلي من وين أجت؟

-أي أنا شو بعرفني عن رب سماها , والله يا رجل ما بعرف من وين أجت على كل حال خليها معك هي والخمس اسلاك هذول للنهاية , حطلي إياهن على جنب , هذول إمحيرات لا هنه زياده ولا هنه ناقصات.

-هات جاي ماشي.
وعاد يستأنف جمع الكمرة:

-هذول أنا مش عارف وين بركبن بس أكيد هون..إف ألله يلعن ظهر أبو اللي صنعها, لويش حاطط فيها كل هذول البراغي, خذ هذول خبيهن .

-هاتهن جاي .

-وكمان هذول.

-وكمان هاتهن جاي .

-وخذ هذي الصفيحه .

-هات جاي أي صدقني إنها ما راح تشتغل نهائيا .

-لا يا زلمه هذول البراغي كلهن إزياده.

-أنا بدي أفهم كيف إزياده, أي أنت بدك اتعدل على الصناعات اليابانية؟ فرجيني كيف بدها تشتغل.

-هسع إصبر إشوي وبتشوف , هات غطاءها الأمامي , وينه .

-هذا الغطا .

-وهذا هو يا سيدي ركب , شو فيه بعد عندنا قطع على الطاوله , ما فيش عندنا العشرين زنبرك (الزمبركات) هذول ما فيش ليهن داعي هذول يمكن على شان الغطا تاع البطاريات وعلى شان يسكرن على غطا الفيلم تاعها , سيبك منهن هذول كلهن إزياده .

-شو يا رجل كلهن زياده .
-آه زياده , أي أنت شايف التلفزيون اللي بصلح فيه على الطاوله ؟.

-آه هذا ماله ؟

-لا مش هذا هذا قطع زائده من تلفزيون (توشيبا) .

-لعاد وينه؟

-هذا هو اللي حاطط أنت إيدك عليه , طل فيه من جوى شو بتلاقي فيه ؟.

-والله ما أنا شايف غير الشاشة والمحول وثلاث أسلاك طالعات من الشاشة.

-صح, ومع ذلك بشتغل وحالته جيده وشوف بعينك , ها ..اشتغل؟.

- آه والله اشتغل .

-أها على شان تعرف أنه أنا ما بخبص تخبيص أنا عارف كل قطعه وين ابتركب .

-طيب بس يا زلمه الزيادات صارن إكثير وين بدي أروح فيهن ؟

-خبيهن للزمن بكره ابتعتازهن لا سمح ألله وخربة الكمرة.

-طيب فرجيني كيف بدها تشتغل.

-هات جاي , وهذي كبسه , شوف اشتغلت ولا ما اشتغلتش؟


-إيه ..إيه والله اشتغلت , فعلا البراغي كلهن اللي أعطيتني إياهن زياده , طيب صورني شوفها بتصور.


-1.....2....ونص...3:أكشن .


-إيه والله لمع لفلاش اللي فيها , يا زلمه هاظا فعلا أنت عبقري أشطر من اليابانيين , هذا لوكنت أنت طبيب باطني وعملت لي عملية قلب مفتوح ! قديش بدك تطلع من جسمي لحوم زائده؟!.

#جهاد_علاونه (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات